महिला स्वयंसहाय्यता गटातून सुनिता अजबेकर यांना मिळाला आत्मविश्वास
चणे, फुटाणे व खारेमुरे विक्री करून विश्वेश्वर महिला बचत गटाच्या माध्यमातून स्वावलंबी होत कुटुंबाच्या आर्थिक स्थैर्यासाठी सुनिता सुदाम अजबकर झटत आहेत. बचत गटामुळे आज त्यांना आत्मविश्वास मिळाला असून यामुळे त्यांचे व्यावहारिक ज्ञान व क्षमताही वाढली आहे. त्यांच्यातील नेतृत्व गुणातील विकासामुळे आज त्या महिला बचतगटाच्या वस्तीस्तर संघाच्या अध्यक्षा बनल्या आहेत.
सुनिता अजबकर गेवराईतील माळी गल्ली येथे राहतात. त्यांचे माहेर परभणी. त्यांचे वडील फुटाणे, शेंगदाणे विक्रीचा व्यवसाय करत असत. पुढे विवाहानंतर गेवराई येथे सासरचाही व्यवसाय फुटाणे व शेंगदाणे निर्मिती व विक्री हाच होता. त्यामुळे त्यांना या व्यवसायाचे ज्ञान पूर्वीपासून होते.
सुनीता ताईंचा हा व्यवसाय सुरु होता. परंतु, भांडवल कमी असल्यामुळे भांडवल वाढ कुठून करावी, या विचारात त्या होत्या. अशातच त्या एके दिवशी बचत गटबाबत माहिती घेण्यासाठी नगर परिष...
