manikrao kokate: राज्यातील कृषी खात्याची सूत्रं सोडण्यापूर्वी मंत्री माणिकराव कोकाटे यांनी पुणे येथील वैकुंठ मेहता राष्ट्रीय सहकार व्यवस्थापन संस्थेत झालेल्या कार्यशाळेत कृषी मंत्री म्हणून आपले शेवटचे भाषण करताना स्मार्ट (SMART) प्रकल्पाच्या माध्यमातून राज्यातील शेतकऱ्यांचे जीवनमान उंचावण्याच्या दिशेने होत असलेल्या कामाची सखोल माहिती दिली.
कोकाटे म्हणाले,“मा. बाळासाहेब ठाकरे कृषी व्यवसाय व ग्रामीण परिवर्तन प्रकल्प (स्मार्ट) हा शेतकऱ्यांच्या आर्थिक सक्षमीकरणासाठी क्रांतीकारी ठरणारा प्रकल्प आहे. राज्य शासन त्याची अंमलबजावणी प्रभावीपणे करण्यासाठी पूर्णपणे कटिबद्ध आहे.”
कार्यशाळेत कृषी राज्यमंत्री आशिष जयस्वाल, कृषी प्रधान सचिव विकासचंद्र रस्तोगी, कृषी आयुक्त सूरज मांढरे, पशुसंवर्धन आयुक्त डॉ. प्रवीण देवरे, प्रकल्प संचालक डॉ. हेमंत वसेकर, आत्मा संचालक सुनील बोरकर, जिल्हास्तरीय अधिकारी आणि शेतकरी उत्पादक कंपन्यांचे प्रतिनिधी उपस्थित होते.
कोकाटे यांनी आपल्या भाषणात पुढे सांगितले की, शेतकरी उत्पादक कंपन्यांना येणाऱ्या अडचणी दूर करण्यात शासन सक्रिय भूमिका बजावत आहे. नानाजी देशमुख कृषी संजीवनी प्रकल्प आणि कृषी समृद्धी योजनेसह समन्वय साधून, भांडवली गुंतवणुकीच्या माध्यमातून शेतकऱ्यांचा सर्वांगीण विकास साधण्याचे ध्येय आहे.
कोकाटे यांच्याकडे क्रीडा खाते
सरकारवर केलेली टिका आणि विधानसभेच्या अधिवेशनादरम्यान मोबाईल वर रमी खेळणाऱ्या व्हिडिओनंतर माणिकराव कोकाटे यांच्याकडील कृषी मंत्री पद जाणार अशी चर्चा होती. ती अखेर खरी ठरून त्यांच्याकडे आता क्रीडा मंत्री पदाचा कार्यभार देण्यात आलेला आहे. मात्र त्यांचे मंत्रीपद शाबूत आहे. रमी खेळण्याच्या कौशल्यामुळेच त्यांना क्रीडा खाते दिले असावे अशी शेतकरी चर्चा करत आहेत.