Maharashtra Weather Forecast मान्सून पुन्हा एकदा सक्रिय झाला असून पुढील काही दिवस महाराष्ट्रात मुसळधार पावसाचे सत्र सुरू राहण्याची शक्यता हवामान विभागाने वर्तवली आहे. निवृत्त हवामानतज्ज्ञ माणिकराव खुळे यांनी दिलेल्या माहितीनुसार राज्यात उद्या व परवा म्हणजे रविवार व सोमवार (दि. १४ व १५ सप्टेंबर) रोजी जोरदार ते अतिजोरदार पाऊस होण्याची शक्यता आहे.
घाटमाथ्यावर अत्याधिक पावसाचा इशारा
विशेषतः पुणे व सातारा जिल्ह्यांच्या घाटमाथ्यावर — मावळ, मुळशी, ताम्हिणी, लोणावळा, खंडाळा, वेल्हे तसेच रायगडमधील पोलादपूर परिसर, तर साताऱ्यातील महाबळेश्वर, जावळी, पाटण आणि लगतच्या भागात दोन दिवसांत अत्याधिक पावसाची शक्यता व्यक्त झाली आहे.
मराठवाडा, खान्देशात पावसाचा जोर काहीसा कमी
मंगळवारपासून (दि. १६ सप्टेंबर) मराठवाडा, खान्देश, नाशिक, अहमदनगर, पुणे, सातारा, सांगली, कोल्हापूर, सोलापूर या १८ जिल्ह्यांत पावसाचा जोर काहीसा कमी होईल. मात्र पूर्णपणे थांबणार नाही, असे अंदाजात म्हटले आहे.
कोकण-विदर्भात पावसाचे सातत्य कायम
मुंबईसह संपूर्ण कोकण पट्टा व विदर्भातील १८ जिल्ह्यांत मात्र जोरदार पावसाचे सातत्य २२ सप्टेंबरपर्यंत राहण्याची शक्यता आहे. त्यामुळे या भागातील नागरिकांनी सतर्क राहण्याची गरज आहे.
परतीच्या पावसाबाबत अंदाज
मान्सून परतीच्या मार्गावर असल्याचे संकेत मिळत असले तरी, पावसाच्या अन्य प्रणाल्यांचे अस्तित्व पाहता तो १५ सप्टेंबरच्या आसपास किंवा त्यानंतरच परत फिरेल, असा अंदाज आहे. मात्र अचूक तारीख वातावरणीय निरीक्षणानंतरच स्पष्ट होणार आहे.