विदर्भ व कोकणात आठवडाभर, तर मराठवाड्यात तीन दिवस; तापमानही काही भागांत ३३ अंशांच्या घरात
राज्यातील पावसाने काही प्रमाणात खंड घेतल्यानंतर आता पुन्हा एकदा पावसाळ्याने जोर धरण्याची चिन्हं हवामान खात्याने वर्तवली आहेत. रक्षाबंधन अर्थात नारळी पौर्णिमा (८ ऑगस्ट) पासून कोकण, गोवा आणि संपूर्ण विदर्भात ८ ते १५ ऑगस्ट दरम्यान मध्यम ते जोरदार पावसाचा अंदाज वर्तवण्यात आला आहे. विशेष म्हणजे मध्य महाराष्ट्रात ८ आणि ९ ऑगस्ट या दोन दिवसांत पावसाच्या सरींची शक्यता आहे,
दरम्यान, मराठवाड्यात पावसाची सुरुवात अगोदरच होण्याची शक्यता आहे. इथं ६ ते ८ ऑगस्ट (बुधवार ते शुक्रवार) या तीन दिवसांत मध्यम ते काही ठिकाणी जोरदार पावसाचा इशारा देण्यात आला आहे. ज्येष्ठ हवामानतज्ज्ञ माणिकराव खुळे यांनी हा अंदाज व्यक्त केला आहे.
जास्त पावसाची शक्यता असलेले जिल्हे पुढीलप्रमाणे आहेत:
कोकण – रायगड, रत्नागिरी, सिंधुदुर्ग
पश्चिम महाराष्ट्र – पुणे, सातारा, सांगली, कोल्हापूर, सोलापूर
मराठवाडा – बीड, धाराशिव, लातूर, परभणी, नांदेड, हिंगोली
विदर्भ – वर्धा, नागपूर, भंडारा, गोंदिया, गडचिरोली, चंद्रपूर, यवतमाळ
या पावसामुळे खरीप पिकांना दिलासा मिळणार असला, तरी ज्या भागांत अतिवृष्टीचा धोका आहे तिथं निचरा व्यवस्थेची दक्षता घ्यावी, असा सल्ला हवामान खात्याने दिला आहे.
तापमानातही बदल
सध्या विदर्भ, जळगाव, छत्रपती संभाजीनगर, नाशिक आणि पुण्याच्या पूर्व भागांत दुपारचं तापमान सरासरीपेक्षा ३ ते ४ अंशांनी वाढले आहे. या भागांमध्ये तापमान ३२ ते ३३ अंश सेल्सिअसपर्यंत पोहोचत आहे, त्यामुळे उन्हाच्या झळा आणि उकाड्याचा त्रास वाढला आहे.
हा उकाडा आगामी पावसाचं लक्षण असू शकतो, असे हवामान तज्ज्ञ सांगतात. राज्यात पूर्व-मोसमी ढगांची निर्मिती सुरू झाल्याने ढगाळ वातावरण आणि विजांसह पावसाची शक्यता अधिकच बळकट झाली आहे.
सूचना: शेतकऱ्यांनी पेरण्या पूर्ण झाल्या असल्यास आंतरमशागत, तणनियंत्रण आणि खते व्यवस्थापनाचं नियोजन पावसाच्या अंदाजानुसार करावं. ढगांच्या गडगडाटासह वीजेचा धोका असलेल्या वेळी उघड्यावर कामे टाळावीत.