ढगाळ वातावरणामुळे द्राक्ष बागेत अनावश्यक वाढ; वेळीच नियंत्रण आवश्यक
नाशिक जिल्ह्यात ३० जुलै ते ३ ऑगस्ट २०२५ या कालावधीत हलक्या ते मध्यम स्वरूपाच्या पावसाचा अंदाज हवामान खात्याने वर्तविला आहे. आकाश सतत ढगाळ राहण्याची शक्यता असून, कमाल तापमान २५ ते ३० अंश से. आणि किमान तापमान २२ ते २५ अंश से. दरम्यान राहील. वाऱ्याचा वेग १८ ते २४ किमी/तास राहण्याची शक्यता आहे.
या पार्श्वभूमीवर द्राक्ष बागांमध्ये वाढलेली दमदार काडी वाढ व बगलफुटी नियंत्रणात ठेवण्यासाठी काही उपाययोजना करणे गरजेचे आहे. ढगाळ हवामानामुळे सायटोकायनीनची कमतरता होते आणि फुटीचा बेजाबाबदार वाढ होतो. परिणामी पेरांचे अंतर वाढते, काडी पोक्त होत नाही आणि अन्नद्रव्ये फुटींमध्ये अडकतात.
द्राक्ष व्यवस्थापन सल्ला:
* अनावश्यक बगलफुटी काढून टाका.
* फुटींना तारेवर व्यवस्थित बांधा.
* ट्रायकोडर्मा @ ५ ग्रॅम प्रति लिटर पाणी या प्रमाणात ४ दिवसांच्या अंतराने ३ ते ४ वेळा फवारणी करा.
* ०-०-५० हे खत ४–५ ग्रॅम प्रति लिटर पाण्यातून फवारणी करा.
* वाफसा स्थितीत हेच खत जमिनीतून १.२५ किलो प्रति एकर द्या.
* यासोबत मॅग्नेशियम सल्फेट १० किलो व फेरस सल्फेट ६–८ किलो जमिनीतून द्या.
डाळिंब फळ वाढ व्यवस्थापन:
सध्या डाळिंब बागेत फळे वाढीच्या अवस्थेत आहेत. त्यामुळे फांद्या झुकत असल्याने त्यांना आधार देणे आवश्यक आहे. जी.आय. वायर किंवा बांबूच्या साहाय्याने फांद्यांना सुतळीने बांधा.
* डाळिंबाच्या झाडांना ड्रिपद्वारे आठवड्यातून एकदा युरिया (१६–२८ किलो), ०-५२-३४ (९ किलो), ०-०-५० (९ किलो) प्रति एकर या प्रमाणात द्या.
* फवारणीसाठी ०-५२-३४ @ ५–६ ग्रॅम आणि मॅग्नेशियम सल्फेट @ ६ ग्रॅम प्रति लिटर पाण्यातून फवारणी करा.