kanda bajarbhav and over production of onion in Bangladesh : मागील आठवड्यापासून राज्यातील बाजारपेठांत सुमारे ३ लाख क्विंटलच्या आसपास दररोजची कांदा आवक होत असून आठवड्याच्या सुरूवातीला ही आवक चार लाख क्विंटलपर्यंत पोहोचली आहे. दुसरीकडे गुजरातमध्येही कांदा आवक दिवसाला १ लाख क्विंटलपेक्षा जास्त होताना दिसत आहे. तर उत्तरप्रदेशमध्येही कांदा आवक ५० हजार क्विंटलपेक्षा जास्त आहे.
या सगळ्याचा एकत्रित परिणाम म्हणजे या आठवड्यात महाराष्ट्रासह नाशिक जिल्ह्यात कांदा बाजारभाव घसरले आहेत. आज दिनांक १० जानेवारी रोजी नाशिकच्या लासलगाव बाजारात कांदा बाजारभाव घसरून सरासरी १८३८ रुपये प्रति क्विंटल झाला आहे. तर पोळ कांदा पिंपळगाव बसवंत येथे २१५० रुपये प्रति क्विंटल असा खरेदी झाला. पुणे जिल्ह्यात कांद्याला सरासरी २ हजाराचा, तर सोलापूर जिल्ह्यात कांद्याला सरासरी १९०० रुपयांचा बाजारभाव प्रति क्विंटलसाठी मिळाला.
गुजरात-दिल्लीसह उत्तरेकडेही कांदा घसरला
दुसरीकडे राज्यात उत्तरप्रदेश, राजस्थान, गुजरात येथेही कांद्याचे बाजारभाव (onion market rate in Delhi) कोसळले आहेत. गुजरातमधील भावनगर येथे सर्वाधिक कांदा आवक होते, तिथे लाल कांद्याला १६३५ ते १७०० रुपयांच्या आसपास सरासरी प्रति क्विंटल बाजारभाव मिळत आहे. हरियाणामध्येही कांद्याचे बाजारभाव कमी होऊन सरासरी २ ते अडीच हजार, दिल्ली मध्ये १७०० ते २५०० रु. सरासरी प्रति क्विंटल, कर्नाटकमध्ये सुमारे २ ते ३ हजार प्रति क्विंटल सरासरी दर, मध्यप्रदेशमध्ये १५०० ते १८०० रुपये प्रति क्विंटल सरासरी असे दर आहेत.
आंध्रमधून आवक वाढली
दरम्यान सोलापूर येथील कांदा आडतदारांनी दिलेल्या माहितीनुसार आंध्रप्रदेशमधील शेतकऱ्यांनी पुन्हा कांदा लागवड केली, त्याची आवक सध्या त्याच्या बाजारात होत असल्याने आपल्याकडील म्हणजेच महाराष्ट्रातील कांद्याला मागणी कमी आहे. परिणामी भाव कमी होती.
निर्यातशुल्काच्या चर्चेने कांदा भाव पडले
डिसेंबर महिन्याच्या दुसऱ्या आठवड्यापासून कांदा बाजारात मोठी घसरण होत आहे. त्यानंतर शेतकरी संघटना, व्यापारी, निर्यातदार आणि लोकप्रतिनिधींनी कांद्यावरील सध्या २० टक्के निर्यातशुल्क आहे, ते काढून टाकले आणि कांदा निर्यातीला मुक्त केले तर कांद्याची निर्यात सुधारून शेतकऱ्यांना चार पैसे जास्त मिळतील अशी केंद्राकडे मागणी केली. मात्र अजूनही ही मागणी प्रत्यक्षात आलेली नाही. केंद्र सरकारने कांदा निर्यातशुल्क काढण्याकडे काहीही लक्ष दिलेले नाही. दरम्यान अनेक शेतकऱ्यांनी निर्यात शुल्क काढले जाईल आणि भाव वाढतील म्हणून कांदा काही दिवस साठवून ठेवला होता. खरीप कांदा जास्त दिवस टिकत नसल्याने शेवटी वाट पाहून त्यांचा कांदा मोठ्या प्रमाणावर बाजारात आला. दुसरीकडे नव्यानेच काढलेला कांदाही बाजारात आला. परिणामी कांदा आवक वाढून बाजारभाव पडले असल्याचे व्यापाऱ्यांचे म्हणणे आहे.
संबंधित व्हिडिओ : सौजन्य ॲग्रो शिवार
बांग्लादेशमुळे निर्यातीवर परिणाम
दक्षिणेकडे मकर संक्रांतीचा सण असल्याने कांद्याचा खप वाढेल अशी अटकळ बांधली जात होती. त्यामुळेच मागील आठवडाभर राज्यात कांदा दर २ हजाराच्या आसपास राहिले. लासलगाव बाजारातही कांद्याचे बाजारभाव २ हजारच्यावरच राहिले. मात्र कालपासून आलेल्या एका बातमीने निर्यातदारांचे टेन्शन वाढविले असून स्थानिक बाजारातील कांदा किंमतीवरही त्याचा परिणाम झाला आहे. ती बातमी म्हणजे बांग्लादेशात यंदा ३० टक्के कांदा लागवड वाढली आहे. (Bangladesh onion export) खरीपाच्या लागवडीत वाढ झाल्याने बांग्लादेशाची कांदा आयात घटणार आहे. कारण सध्या या आठवड्यात तेथील बाजारात स्थानिक कांदा आवक वाढल्याने त्यांना भविष्यात कांद्याची गरज कमी पडणार आहे. त्यातून आपल्याकडच्या निर्यातीवर बंधने आहेत. त्यामुळेही आपल्याकडील बाजारभाव पडले आहेत.