NDCC bank नाशिक जिल्हा मध्यवर्ती बँकेने थकबाकीदार शेतकऱ्यांकडून कर्ज वसुलीसाठी सुरू केलेली सामोपचार कर्जफेड योजना तात्काळ रद्द करावी, अशी ठाम मागणी शेतकऱ्यांनी केली आहे. आज शिक्षणमंत्री दादाजी भुसे, क्रीडामंत्री माणिकराव कोकाटे, अन्न व औषध प्रशासन मंत्री नरहरी झिरवळ आणि इगतपुरीचे आमदार हिरामण खोसकर यांना आंदोलक शेतकऱ्यांनी निवेदन देत या योजनेविरोधात तीव्र भावना व्यक्त केल्या.
शेतकरी समन्वय समितीचे अध्यक्ष भगवान बोराडे, आदिवासी सहकारी संस्था राज्याध्यक्ष कैलास बोरसे, दिलीप पाटील, बाळासाहेब बोरस्ते, रमेश बोरस्ते यांच्यासह ९३८ शेतकऱ्यांनी उपस्थित राहून मंत्र्यांना भेट दिली. आंदोलनकर्त्यांनी जिल्हा बँकेचा २ ऑगस्ट रोजी थकबाकीदार सभासदांकडे थेट वसुलीसाठी जाहीर केलेली योजना रद्द करण्याची मागणी केली.
मंत्र्यांकडून दिलासा; व्याजमाफीचा निर्णय लवकरच
यावेळी आंदोलकांना दिलासा देताना मंत्री सर्वश्री माणिकराव कोकाटे, दादाजी भुसे आणि नरहरी झिरवळ यांनी लवकरच जिल्हा बँकेच्या कर्जावरील व्याजमाफीबाबत सकारात्मक निर्णय जाहीर केला जाईल, असे आश्वासन दिले. मात्र, आंदोलक शेतकऱ्यांनी स्पष्टपणे सांगितले की, केवळ मुद्दल भरणे आम्हाला मान्य नाही, आम्ही संपूर्ण कर्जमाफीच मागत आहोत.
महोत्सवातच शेतकऱ्यांचा आक्रमक पवित्रा
रानभाजी महोत्सवाच्या निमित्ताने नाशिकमध्ये झालेल्या कार्यक्रमात शेतकऱ्यांनी थेट मंत्र्यांना घेरले आणि कर्जवसुली योजनेचा निषेध केला. बँकेने काढलेले परिपत्रक शेतकऱ्यांच्या हिताविरुद्ध असल्याचे सांगत ते तातडीने रद्द करण्याची मागणी आंदोलकांनी निवेदनाद्वारे केली.
आधीच झालेला विरोध
या संदर्भात राज्य बँकेचे अध्यक्ष विद्याधर अनास्कर यांच्या उपस्थितीत माणिकराव कोकाटे आणि जिल्हा प्रशासनाशी आधीच चर्चा झालेली होती. चार जुलै रोजी जिल्हा बँकेत विशेष सर्वसाधारण सभेतही शेतकऱ्यांनी सामोपचार योजनेला एकमुखी विरोध केला होता आणि संपूर्ण व्याजमाफीचा ठराव केला होता. परंतु राज्य शासनाने हा ठराव मान्य केल्याचे सांगत पुन्हा योजना लागू करण्याचा प्रयत्न होत आहे, ज्यामुळे शेतकरी संतप्त आहेत.
मुख्यमंत्री, उपमुख्यमंत्री यांच्याकडे निवेदन देणार
शेतकऱ्यांनी स्पष्टपणे सांगितले की, जोपर्यंत संपूर्ण कर्जावरील व्याज माफ होत नाही, तोपर्यंत एक रुपयाही बँकेकडे भरणार नाही. लवकरच मुख्यमंत्री देवेंद्र फडणवीस, उपमुख्यमंत्री अजित पवार, उपमुख्यमंत्री एकनाथ शिंदे, सहकारमंत्री बाळासाहेब पाटील यांच्यासमवेत बैठक घेऊन निर्णय घेण्याची मागणी शेतकऱ्यांनी केली आहे.
अन्न व औषध प्रशासन मंत्री नरहरी झिरवळ यांनी आंदोलकांना आश्वस्त करत सांगितले की, उद्या अजितदादांची भेट घेऊन शेतकऱ्यांच्या मागण्यांचे निवेदन त्यांच्याकडे सुपूर्द करून राज्य शासनाला व्याजमाफीबाबत निर्णय घेण्यासाठी विनंती करणार असल्याचे त्यांनी जाहीर केले.