onion export to Bangaladesh: बांगलादेशात सध्या कांद्याच्या किमतीत (kanda bajar bhav) झपाट्याने वाढ होत असून, देशात कांद्याची तीव्र टंचाई निर्माण झाली आहे. देशांतर्गत उत्पादन व साठा अपुरा पडत असल्याने बांगलादेशातील प्रमुख आयातदार संघटनांनी सरकारकडे भारतातून तातडीने कांद्याची आयात सुरू करण्याची मागणी केली आहे. त्यामुळे येत्या काही दिवसांत भारतातून कांदा निर्यात सुरू होण्याची शक्यता निर्माण झाली आहे, जी भारतीय कांदा उत्पादक शेतकऱ्यांसाठी एक सकारात्मक संधी ठरू शकते.
३१ जुलै २०२५ रोजी सोनामस्जिद आयात-निर्यात संघटनेचे पत्र
बांगलादेश सरकारच्या कृषी मंत्रालयाला एक अधिकृत निवेदन पाठवले. या निवेदनात देशात कांद्याचे साठे कमी असल्याने भाव नियंत्रणाबाहेर जात असून, बाजारात गडबड निर्माण झाली आहे, असे स्पष्ट करण्यात आले आहे. त्यामुळे कांदा आयातीसाठी ‘आयात परमिट’ (IP) तातडीने उघडण्याची विनंती करण्यात आली आहे.
निवेदनात म्हटले आहे की, गेल्या काही आठवड्यांत देशातील बाजारात कांद्याचे दर ४–५ पट वाढले आहेत. परिणामी सर्वसामान्य ग्राहक आणि हॉटेल व्यवसायिक हैराण झाले आहेत. मागील वर्षी भारताने कांद्याच्या निर्यातीवर निर्बंध आणल्यानंतर निर्माण झालेली स्थिती यंदाही उद्भवू नये, यासाठी ही आयात महत्त्वाची आहे.
बांगलादेश सरकारकडून १५ ऑगस्टनंतर कांदा आयातीस परवानगी दिली जाण्याची शक्यता आहे. यामुळे नाशिक, जळगाव, धुळे, सोलापूर आणि पुणे जिल्ह्यात साठवणूक केलेल्या कांद्याला बाह्य बाजारपेठ उपलब्ध होईल. सध्या स्थानिक बाजारात कांद्याचे (kanda market) दर १०००–१३०० रुपये क्विंटल दरम्यान असून, निर्यातीची संधी मिळाल्यास दरात पुन्हा सुधारणा होऊ शकते.
दरम्यान, बांगलादेशातील कांदा उत्पादक मात्र चिंतेत आहेत. ते म्हणतात की यंदा देशांतर्गत पीक समाधानकारक असून, जर भारतातून आयात सुरू झाली तर स्थानिक शेतकऱ्यांना योग्य भाव मिळणार नाही. त्यामुळे सरकारला जनतेच्या गरजा आणि शेतकऱ्यांचे हित यात समतोल साधण्याचे आव्हान आहे.
एकूणच, बांगलादेशात कांद्याच्या वाढत्या किमती आणि टंचाईमुळे भारतातून निर्यातीस पुन्हा चालना मिळण्याची शक्यता आहे. भारतीय शेतकऱ्यांसाठी ही सकारात्मक बातमी असून, केंद्र सरकारने योग्य धोरण घेतल्यास देशांतर्गत बाजारातही कांद्याचे दर स्थिर राहण्यास मदत होईल.