Bangladesh onion export news बांगलादेशच्या चपाइनवाबगंज जिल्ह्यातील सोनामस्जिद भू-सीमारेषेवरून गुरूवार दिनांक १४ ऑगस्ट रोजी सुमारे १०० टन भारतीय कांदा दाखल झाला. जवळपास आठ महिन्यांपासून थांबलेली आयात या दिवशी पुन्हा सुरू झाली.
भारतानून काही महिन्यांपूर्वी कांदा निर्यात थांबली होती, मात्र आता ती परत सुरू झाल्याने आपल्या शेतकऱ्यांना (kanda bajar bhav) दिलासा मिळाला आहे. बांग्लादेशातील स्थानिक माध्यमांती या संदर्भात वृत्त दिलेले आहे. एकूण चार ट्रक बांग्लादेशाच्या सीमेवर कांदा घेऊन दाखल झाल्याचे समजते.
परवानेही मिळाले
दिनांक १४ ऑगस्ट रोजी बांग्लादेशातून आयपी आणि एलसी (लेटर ऑफ क्रेडिट) दोन्ही मिळाल्याने भारतातून कांदा आयातीबद्दल सकारात्मक वातावरण झाले होते. ढाका येथील श्याम बाजार या होलसेल मंडीत मागच्या आठवड्यात ८० टकापेक्षा जास्त प्रति किलो कांदा बाजार भाव पोहोचले होते. मात्र भारतीय कांदा आयात होणार या बातमीनंतर हे बाजारभाव आता दहा टकाने खाली घसरले आहेत, असे स्थानिक ट्रेडर्सचे म्हणणे आहे.
कांदा निर्यातीची तयारी जोरात
बांग्लादेशातील स्थानिक व्यापाऱ्यांनी सांगितले की, अचानक वाढलेल्या भावावर नियंत्रण आणण्यासाठी आणि स्थानिक मागणी पूर्ण करण्यासाठी भारतीय कांदा उपयोगी ठरणार आहे. आयात पुन्हा सुरू झाल्याने बांगलादेशातील ग्राहकांनाही दिलासा मिळेल, अशी अपेक्षा आहे.
दरम्यान धुळे जिल्ह्यातील पिंपळनेर येथील कांदा उत्पादक आणि कांदा व्यापारी असलेल्या संदीप पाटील यांनी शुक्रवारी ६० टन कांदा बांग्लादेशासाठी रवाना केल्याची माहिती दिली आहे. त्यांनी सांगितले की मी स्वत: कांदा उत्पादक शेतकरी असून व्यापारीही आहे. यंदा मी पहिल्यांदाच बांग्लादेशात कांदा निर्यात करत असून दोन ट्रक बांग्लादेशकडे रवाना झालेले आहेत.
लासलगाव आणि पिंपळगाव येथील अनेक निर्यातदारांनी कांदा निर्यातीचे नियोजन सुरू केले असून मागील दोन दिवस अनेक व्यापाऱ्यांच्या गोडाऊनमध्ये कांदा गाड्या भरण्याचे काम जोरात सुरू असल्याची माहिती संबंधितांनी दिली आहे.
भारतीय शेतकऱ्यांना काय फायदा?
निर्यात शुल्क हटवले: भारत सरकारने काही महिन्यांपूर्वी कांद्यावरील २० टक्के निर्यात शुल्क रद्द केले. त्यामुळे शेतकऱ्यांना परदेशी बाजारपेठेत कांदा पाठवून अधिक चांगला भाव मिळू शकतो.
महाराष्ट्रातील कांद्याला मागणी: बांगलादेशात मोठ्या प्रमाणात भारतीय कांद्याची मागणी असल्याने विशेषतः महाराष्ट्र, मध्यप्रदेश आणि गुजरातमधील कांदा उत्पादकांना याचा थेट फायदा होईल.
बाजारभावात स्थिरता: कांद्याचा अतिरिक्त साठा फक्त देशांतर्गत बाजारात येण्याऐवजी बाहेरही विक्रीला जाऊ लागल्याने देशातील भाव ढासळण्यापासून काही प्रमाणात बचाव होईल.
थेट निर्यातीतून जास्त नफा: आता शेतकरी उत्पादक कंपन्या (FPOs) किंवा संघटनांच्या माध्यमातून थेट निर्यात करण्याची संधी वाढली आहे. यातून मध्यस्थांचा हस्तक्षेप कमी होऊन शेतकऱ्यांच्या हाती जास्त नफा येऊ शकतो.
भारतातून बांगलादेशात गेलेले हे १०० टन कांद्याचे पहिले ट्रक केवळ स्थानिक तुटवडा भागवण्यासाठी नाही तर भारतीय शेतकऱ्यांसाठीही मोठी संधी आहे. निर्यात खुली झाल्याने आंतरराष्ट्रीय बाजारपेठेत पुन्हा प्रवेश मिळत असून शेतकऱ्यांना चांगला दर आणि स्थिर विक्रीचा फायदा होणार असल्याचे या क्षेत्रातील जाणकारा सांगत आहे.