नाशिक जिल्ह्यातील कांदा उत्पादक शेतकरी आणि महाराष्ट्र कांदा उत्पादक शेतकरी संघटनेचे पदाधिकारी बाळकृष्ण सांगळे यांची कन्या लेखिका कवयित्री अश्विनी सांगळे यांचा राज्यस्तरिय पुरस्काराने गौरव करण्यात आला. शेतकरी कुटुंबासाठी ही गौरवाची बाब असून सध्या त्याचे सर्वत्र कौतुक होत आहे.
यासंदर्भात सविस्तर वृत्त असे की, बी. एस. एफ. बहुउद्देशीय संस्था, अमरावती, संत कबीर बहुउद्देशीय संस्था, बुलढाणा आणि उपेक्षित नायक यांच्या संयुक्त विद्यमाने १७ ऑगस्ट २०२५ रोजी अमरावती येथे ‘समाज क्रांती राज्यस्तरीय पुरस्कार सोहळा’ उत्साहात पार पडला.
हा सोहळा अमरावतीमधील साई पॅलेस हॉटेलमध्ये आयोजित करण्यात आला होता, ज्यात महाराष्ट्रातील चित्रपटसृष्टी आणि विविध क्षेत्रांतील अनेक मान्यवरांची उपस्थिती होती.
या सोहळ्याचे वैशिष्ट्य म्हणजे, महाराष्ट्राच्या विविध भागांतील आठ व्यक्तींना त्यांच्या महत्त्वपूर्ण योगदानासाठी गौरवण्यात आले. यामध्ये नाशिक जिल्ह्यातील कांदा उत्पादक शेतकरी कुटुंबातील कन्या अश्विनी सांगळे यांचाही समावेश होता, ज्यांना त्यांच्या उल्लेखनीय सामाजिक कार्यासाठी ‘समाज क्रांती पुरस्कार’ प्रदान करण्यात आला.
संस्थेचे भूषण सरदार यांनी या पुरस्काराची घोषणा करत अश्विनी यांना पुढील वाटचालीस शुभेच्छा दिल्या. विशेष म्हणजे, अश्विनी सांगळे यांनीच या संपूर्ण कार्यक्रमाचे अतिशय प्रभावी सूत्रसंचालन केले, ज्याचे सर्वत्र कौतुक झाले.
या सोहळ्यात पत्रकार मनीष मुढा, डॉ. श्याम जाधव, डॉ. संदीप काकड, रामचंद्र ताठे, प्रवीण जाधव, देवीदास साळवे आणि रमेश गिरी यांसारख्या अनेक कर्तृत्ववान व्यक्तींनाही पुरस्काराने सन्मानित करण्यात आले. बी. एस. एफ. बहुउद्देशीय सामाजिक संस्थेचे संस्थापक आणि संचालक, जे उपेक्षित नायक वृत्तपत्राचे मुख्य संपादक देखील आहेत, त्यांनी दिलेल्या माहितीनुसार हे पुरस्कार अमरावतीबाहेरील, विशेषतः ठाणे, नाशिक, मुंबई, पुणे आणि रायगड येथील निवडक लोकांना प्रदान करण्यात आले.
हा पुरस्कार सोहळा महान समाजसुधारक गाडगे बाबा, छत्रपती शिवाजी महाराज, महात्मा ज्योतिराव फुले आणि डॉ. बाबासाहेब आंबेडकर यांच्या विचारांनी प्रेरित होता. संस्थेच्या पदाधिकाऱ्यांनी कार्यक्रमात उपस्थित सर्व पाहुण्यांचे आभार मानले.